SCP (Stop the Cycle of Poverty — “Qashshoqlik zanjirini to‘xtatish”) jamoasi Toshkent shahridagi Xalqaro Vestminster universiteti qoshidagi Akademik litseyning (TXVUAL) birinchi bosqich o‘quvchilari uchun taqdimot o‘tkazdi.

Uchrashuv davomida o‘quvchilar SCP loyihasining maqsadi, amalga oshirilayotgan tashabbuslar hamda ijtimoiy himoyaga muhtoj jamoalardagi bolalarning sifatli ta’lim olish imkoniyatlarini kengaytirishga qaratilgan faoliyati bilan tanishdilar.

SCP matematika, ingliz tili va moliyaviy savodxonlik fanlari bo‘yicha bepul darslar tashkil etish orqali bolalarga bilim, o‘ziga ishonch va yaxshi kelajak qurish imkoniyatlarini taqdim etishni maqsad qilgan.

SCP nafaqat ta’limiy tashabbus, balki ijobiy o‘zgarishlar amaliy harakatlardan boshlanishiga ishonadigan yoshlar hamjamiyatidir.

Jamoa kelajakda ko‘ngillilar, ustozlar va ijobiy o‘zgarishlar tashabbuskorlariga aylanishi mumkin bo‘lgan yangi avlod o‘quvchilari bilan hamkorlik qilishdan mamnun. Birgalikda har bir bola, har bir dars va har bir imkoniyat orqali qashshoqlik zanjirini to‘xtatishimiz mumkin.